St. Mina Doxology - 2nd :: Ⲛ̀ⲑⲱⲕ ⲟ̀ⲩⲱⲛⲓ ⲙ̀ⲙⲁⲟⲅⲁⲣⲓⲧⲏⲥ :: وأيضا للشهيد مارمينا العجايبى

Ⲛ̀ⲑⲱⲕ ⲟ̀ⲩⲱⲛⲓ ⲙ̀ⲙⲁⲟⲅⲁⲣⲓⲧⲏⲥ: ⲉϥⲥⲱⲧⲡ ⲉ̀ⲓⲛⲟⲩⲃ ⲛⲉⲙ ⲡⲓϩⲁⲧ: ⲱ̀ ⲡⲓϫⲱⲣⲓ ⲛ̀ⲁ̀ⲑⲗⲏⲧⲏⲥ: ⲁⲡⲁ Ⲙⲏⲛⲁ ⲛ̀ⲧⲉ ⲛⲓⲪⲁⲓⲁⲧ.

Ⲉⲑⲃⲉ ⲡ̀ⲁϣⲁⲓ ⲛ̀ⲧⲉ ⲛⲉⲕⲙⲏⲓⲛⲓ: ⲉⲧⲁⲕⲓ̀ⲣⲓ ⲙ̀ⲙⲱⲟⲩ ⲛ̀ⲥⲏⲟⲩ ⲛⲓⲃⲉⲛ: ⲁⲩⲙⲟⲩϯ ⲉ̀ⲣⲟⲕ ϫⲉ ⲡⲓⲥⲏⲓⲛⲓ: ⲉⲧⲧⲁⲗϭⲟ ⲛ̀ϣⲱⲛⲓ ⲛⲓⲃⲉⲛ.

Ⲙⲉⲛⲉⲛⲥⲁ ⲛⲁⲓ ⲟⲛ ⲡⲉⲕⲥⲱⲙⲁ: ⲁⲩⲱ̀ⲗⲓ ⲙ̀ⲙⲟϥ ⲉ̀ⲧ̀ⲭⲱⲣⲁ ⲛ̀Ⲭⲙⲓ: ⲁϥⲓ̀ⲣⲓ ⲛ̀ϩⲁⲛⲕⲁⲑⲁⲣⲧⲱⲙⲁ: ⲛⲉⲙ ϩⲁⲛ ⲙⲏⲓⲛⲓ ⲛⲉⲙ ⲡ̀ⲉⲣⲟⲩⲟⲧ.

Ⲛⲓⲥⲧⲩⲭⲟⲥ ⲛ̀ϫⲉ ⲡⲉⲕⲣⲁⲛ: ϫⲉ ⲡⲓⲁ̀ⲙⲏⲛ ⲉⲧⲥ̀ⲙⲁⲣⲱⲟⲩⲧ: ϫⲉ ⲛ̀ⲑⲱⲟⲩ ⲅⲁⲣ ⲁⲩϯⲛⲁⲛ: ⲙ̀ⲡⲓⲣⲁϣⲓ ⲛⲉⲙ ⲛ̀ⲉ̀ⲣⲟⲩⲟ̀ⲧ.

Ⲁϥⲥⲁϫⲓ ⲉⲑⲃⲏⲧⲕ ⲟⲩⲟϩ ⲁϥⲙⲟⲩϯ ⲉ̀ⲣⲟⲕ: ⲛ̀ϫⲉ Ⲇⲁⲩⲓⲇ ⲡⲓⲡⲉⲑⲛⲁⲛⲉϥ: ϫⲉ ⲟⲩϣ̀ⲫⲏⲣⲓ ⲡⲉ Ⲡ̀ⲟ̅ⲥ̅ Ⲫϯ: ϧⲉⲛ ⲛⲏⲉ̅ⲑ̅ⲩ̅ ⲛ̀ⲧⲁϥ.

+ Ⲧⲱⲃϩ ⲙ̀Ⲡⲟ̅ⲥ̅ ⲉ̀ϩ̀ⲣⲏⲓ ⲉ̀ϫⲱⲛ: ⲱ̀ ⲡⲓⲁ̀ⲑⲗⲟⲫⲟⲣⲟⲥ ⲙ̀ⲙⲁⲣⲧⲩⲣⲟⲥ: ⲁ̀ⲡⲁ Ⲙⲏⲛⲁ ⲛ̀ⲧⲉ ⲛⲓⲪⲁⲓⲁⲧ: ⲛ̀ⲧⲉϥ ⲭⲁ ⲛⲉⲛⲛⲟⲃⲓ ⲛⲁⲛ ⲉⲃⲟⲗ.