Psali Adam for both the Feasts of Circumcision and the entry into the Temple :: Ⲁ̀ⲛⲓⲟⲩⲓ̀ ⲙ̀Ⲡⲟ̅ⲥ̅

Ⲁ̀ⲛⲓⲟⲩⲓ̀ ⲙ̀Ⲡⲟ̅ⲥ̅: ⲛ̀ⲟⲩⲱ̀ⲟⲩ ⲛⲉⲙ ⲟⲩⲧⲁⲓⲟ̀: ⲁ̀ⲛⲓⲟⲩⲓ̀ ⲙ̀Ⲡⲟ̅ⲥ̅: ⲛ̀ϩⲁⲛϩⲩⲙⲛⲟⲥ ⲙ̀ⲡⲓϭ̀ⲣⲟ.
Ⲃⲱⲣⲡ ⲛⲁϥ ⲉ̀ⲡ̀ϣⲱⲓ ⲙ̀ⲙⲏⲛⲓ: ⲛ̀ϩⲁⲛϩⲓⲏⲃ ⲛ̀ⲁⲧⲭⲁⲣⲟϥ: ⲛⲉⲙ ϩⲁⲛϫⲱⲙ ⲫⲉⲣⲓ: ⲛⲉⲙ ϩⲁⲛⲑⲩⲥⲓⲁ̀ ⲛ̀ⲁⲧⲥ̀ⲛⲟϥ.

+ Ⲅⲉ ⲅⲁⲣ ⲁϥⲑⲁⲙⲓⲟⲛ: ⲟⲩⲟϩ ⲁ̀ⲛⲟⲛ ⲁⲛ ⲡⲉ: ⲁϥⲧⲟⲩⲃⲟⲛ ⲁϥⲧ̀ⲥⲁⲃⲟⲛ: ⲉ̀ⲛⲓⲙⲱⲓⲧ ⲛ̀ⲧⲉ ⲧ̀ⲫⲉ.
+ Ⲇⲁⲩⲓⲇ ⲛ̀ⲥⲏⲟⲩ ⲛⲓⲃⲉⲛ: ⲉϥϫⲟⲥ ϧⲉⲛ ⲟⲩⲙⲉⲑⲙⲏⲓ: ⲱ̀ⲟⲩⲛⲓⲁⲧⲟⲩ ⲛ̀ⲟⲩⲟⲛ ⲛⲓⲃⲉⲛ: ⲉⲧϣⲟⲡ ϧⲉⲛ ⲡⲉⲕⲏⲓ.

Ⲉⲓ̀ⲉ̀ⲓ̀ ⲉ̀ϧⲟⲩⲛ: ϣⲁ ⲡⲓⲙⲁⲛ̀ⲉⲣϣⲱⲟⲩϣⲓ: ⲛ̀ⲧⲉ Ⲫϯ ϧⲉⲛ ⲟⲩⲙⲟⲩⲛ: ⲉⲓⲉ̀ϣⲱⲧ ⲛ̀ϩⲁⲛϣⲱⲟⲩϣⲓ.
Ⲍⲉ ⲟⲛⲧⲱⲥ ϧⲉⲛ ⲟⲩϣ̀ⲫⲏⲣⲓ: ⲁ̀Ⲡⲭ̅ⲥ̅ ⲡⲓⲙⲁⲓⲣⲱⲙⲓ: ϣⲱⲡ ⲉ̀ⲣⲟϥ ⲙ̀ⲡⲓⲥⲉⲃⲓ: ⲙ̀ⲫ̀ⲣⲏϯ ⲛ̀ⲛⲓⲣⲱⲙⲓ.

+ Ⲏⲡⲡⲉ ⲅⲁⲣ Ⲗⲟⲩⲕⲁⲥ: ⲁϥⲥⲁϫⲓ ϧⲉⲛ ⲫⲁⲓ: ⲉⲑⲃⲉ Ⲙⲁⲥⲓⲁⲥ: ⲟⲩⲟϩ ⲁϥⲥ̀ϧⲁⲓ.
+ Ⲑⲉⲃⲇⲱⲙⲁⲥ ⲉ̀ⲧⲁⲥⲕⲏⲛ: ⲁⲩⲙⲟⲩϯ ⲉ̀ⲣⲟϥ: ϫⲉ Ⲓⲏ̅ⲥ̅ ⲡⲉ ⲡⲉϥⲣⲁⲛ: ⲕⲁⲧⲁ ⲡ̀ⲥⲁϫⲓ ⲙ̀ⲡⲓⲁⲅⲅⲉⲗⲟⲥ.

Ⲓⲱⲥⲏϥ ⲛⲉⲙ Ⲥⲁⲗⲱⲙⲏ: ⲛⲉⲙ Ⲙⲁⲣⲓⲁ̀ ⲧⲉϥⲙⲁⲩ: ⲉ̀ⲧⲁⲩϫⲱⲕ ⲙ̀ⲡⲓⲙ̅: ⲛ̀ⲉ̀ϩⲟⲟⲩ ⲉ̀ⲧⲉ ⲙ̀ⲙⲁⲩ.
Ⲕⲉ ⲡⲁⲗⲓⲛ ⲁⲩϣⲉⲛⲱⲟⲩ: ⲉ̀ⲡ̀ⲏⲓ ⲛ̀ϯⲡ̀ⲣⲟⲥⲉⲩⲭⲏ: ⲉⲑⲣⲟⲩⲓ̀ⲛⲓ ⲉ̀ϫⲱⲟⲩ: ⲛ̀ϩⲁⲛⲥⲱⲧⲡ ⲛ̀ⲉⲩⲭⲏ.

+ Ⲗⲟⲓⲡⲟⲛ ⲅⲁⲣ ⲁⲩϫⲓⲙⲓ: ⲛ̀Ⲥⲓⲙⲱⲛ ⲡⲓⲟⲩⲏⲃ: ⲉϥⲟ̀ϩⲓ ⲉ̀ⲣⲁⲧϥ ⲉϥϣⲉⲙϣⲓ: ϧⲉⲛ ⲧⲉϥⲙⲉⲧⲟⲩⲏⲃ.
+ Ⲙ̀ⲡⲉϥⲉⲣⲁ̀ⲙⲉⲗⲏⲥ: ⲁⲗⲗⲁ ⲁϥϯ ⲙ̀ⲡⲉϥⲟⲩⲟⲓ: ⲁϥⲟⲗϥ ϧⲉⲛ ⲟⲩⲓⲏⲥ: ⲉ̀ϫⲉⲛ ⲛⲉϥϫ̀ⲫⲟⲓ.

Ⲛⲁϥ ϫⲟⲥ ϫⲉ ⲡⲁⲟ̅ⲥ̅: ϯⲛⲟⲩ ⲭ̀ⲛⲁⲭⲁ ⲡⲉⲕⲃⲱⲕ: ϫⲉ ⲛ̀ⲑⲟⲕ ⲡⲉ ⲉ̀ⲧⲁⲕⲣⲱⲓⲥ: ⲉ̀ⲣⲟⲓ ⲉⲑⲣⲏⲓⲛⲁⲩ ⲉ̀ⲣⲟⲕ.
Ⲝⲁⲡⲓⲛⲁ ⲁⲥⲓ̀: ⲛ̀ϫⲉ Ⲁⲛⲛⲁ ϯⲡ̀ⲣⲟⲫⲏⲧⲏⲥ: ϯⲥⲉⲙⲛⲉ ⲛ̀ⲥ̀ϩⲓⲙⲓ: ⲁⲥⲉⲣⲟ̀ⲙⲟⲗⲟⲅⲓⲧⲏⲥ.

+ Ⲟⲩⲟϩ ⲛⲁⲥ ⲥⲁϫⲓ ⲉⲑⲃⲏⲧϥ: ϧⲁⲧⲉⲛ ⲟⲩⲟⲛ ⲛⲓⲃⲉⲛ: ⲟⲩⲟϩ ⲡⲓⲗⲁⲟⲥ ⲧⲏⲣϥ: ⲛⲁⲩϫⲟⲩϣⲧ ⲉ̀ⲣⲟϥ ⲛ̀ⲥⲏⲟⲩ ⲛⲓⲃⲉⲛ.
+ Ⲡⲉⲛⲛⲏⲃ ⲡⲓⲙⲁⲓⲣⲱⲙⲓ: ⲡⲉⲛⲟⲩⲣⲟ Ⲡⲭ̅ⲥ̅: ⲁϥϣⲱⲡ ⲉ̀ⲣⲟϥ ⲙ̀ⲡⲓⲥⲉⲃⲓ: ⲉⲑⲣⲉϥϫⲱⲕ ⲙ̀ⲡⲓⲛⲟⲙⲟⲥ.

Ⲣⲁϣⲓ ⲟⲩⲟϩ ⲑⲉⲗⲏⲗ: ⲱ̀ ⲡ̀ⲅⲉⲛⲟⲥ ⲛ̀ⲛⲓⲣⲱⲙⲓ: ϫⲉ Ⲉⲙⲙⲁⲛⲟⲩⲏⲗ: ⲁϥⲱ̀ⲗⲓ ⲛ̀ⲛⲉⲛⲛⲟⲃⲓ.
Ⲥⲉ ⲟⲛⲧⲱⲥ ⲁϥⲧⲁϫⲣⲟ: ⲙ̀ⲡⲉϥϫⲓⲛ ⲉⲣⲣⲱⲙⲓ: ⲁϥϫⲱⲕ ⲙ̀ⲡⲉⲛⲑⲉⲃⲓⲟ̀: ⲛ̀ϩ̀ⲣⲏⲓ ϧⲉⲛ ⲡⲉϥⲥⲉⲃⲓ.

+ Ⲧⲟⲧⲉ ⲁϥⲧ̀ⲥⲁⲃⲟⲛ: ⲉ̀ϩⲁⲛⲙⲱⲓⲧ ⲛ̀ⲧⲉ ⲡⲓⲟⲩϫⲁⲓ: ⲟⲩⲟϩ ⲁϥⲥⲱϯ ⲙ̀ⲙⲟⲛ: ⲕⲁⲧⲁ ⲡⲉϥⲛⲓϣϯ ⲛ̀ⲛⲁⲓ.
+ Ⲩⲥ̅ Ⲑⲥ̅ ⲛ̀ⲑⲟϥ: ϧⲉⲛ ⲟⲩⲁ̀ⲗⲏⲑⲓⲁ̀: ⲁⲥⲙⲓⲥⲓ ⲙ̀ⲙⲟϥ: ⲛ̀ϫⲉ ⲑⲏⲉ̅ⲑ̅ⲩ̅ Ⲙⲁⲣⲓⲁ̀.

Ⲫⲏ ⲉ̀ⲧⲟⲩϥⲁⲓ ⲙ̀ⲙⲟϥ: ⲛ̀ϫⲉ ⲛⲓⲧⲁⲝⲓⲥ ⲉⲧϩⲏⲡ: ⲁϥⲱ̀ⲗⲓ ⲙ̀ⲙⲟϥ: ⲛ̀ϫⲉ Ⲥⲓⲙⲱⲛ ⲡⲓⲟⲩⲏⲃ.
Ⲭ̀ⲟⲩⲁⲃ ⲱ̀ Ⲡⲭ̅ⲥ̅: ϧⲉⲛ ⲧⲉϥⲟⲓⲕⲟⲛⲟⲙⲓⲁ̀: ⲟⲩⲁⲧϣ̀ϯϣⲓ ⲉ̀ⲣⲟⲥ: ⲧⲉ ⲧⲉⲕϫⲱⲙ ⲛⲉⲙ ⲧⲉⲕⲥⲟⲫⲓⲁ̀.

+ Ⲯⲉⲡⲓ ⲙ̀ⲡⲉⲕⲗⲁⲟⲥ: ⲙⲁⲧⲁⲗϭⲟ ⲛ̀ⲛⲟⲩϣⲱⲛⲓ: ⲛⲉⲙ ⲛⲏⲉ̀ⲧⲁⲩⲉⲛⲕⲟⲧ Ⲡⲟ̅ⲥ̅: ⲁ̀ⲣⲓⲡⲟⲩⲙⲉⲩⲓ̀.
+ Ⲱ̀ ⲥⲁⲩⲧⲟⲥ ⲡⲉⲕⲃⲱⲕ: ⲁ̀ⲛⲟⲕ ϧⲁ ⲡⲓⲣⲉϥⲉⲣⲛⲟⲃⲓ: ϯϯϩⲟ ⲉ̀ⲣⲟⲕ: ⲭⲱ ⲛⲏⲓ ⲉ̀ⲃⲟⲗ ⲛ̀ⲛⲁⲛⲟⲃⲓ.